Joan den urriaren 14an, BIH4Cren jarraipen-bilera berri bat egin zen Tecnaliak Donostian duen egoitzan. BIH4C euskal industriaren deskarbonizaziorako berrikuntza-hub bat da, Basquenergy Clusterrek dinamizatua eta 10 enpresa eta erakundek osatua. Saioan, bazkideek garatzen ari diren erakusleetan egindako aurrerapenak partekatu zituzten, eta Tecnaliako elektrolizagailua eta hidrogeno laborategiak bertatik bertara ezagutu zituzten.
BIH4C Lantaldea “IS2H4C – From Industrial Symbiosis to Hubs for Circularity” Europako proiektuaren barruan kokatzen da. Proiektu horren helburua da deskarbonizazioa bultzatzea industria desberdinetan, sinergia energetikoak bilatu eta ezarriz, baliabideen erabilera eraginkorra sustatuz eta berrikuntza teknologikoa bultzatuz. Horrek lau berrikuntza-hub sortzea dakar Euskadin, Alemanian, Herbehereetan eta Turkian. Euskal hub-a Tecnalia, Sidenor, Calcinor, Lointek, SBS, Petronor Innovación, Smurfit Kappa, Nortegas, Bilbo Bizkaia Ur Partzuergoa eta BASQUENERGY Clusterrek osatzen dute.
Jarraipen-bileran, Europako proiektuaren aurrerapenak berrikusi ziren, euskal hub-ak lantzen dituen hiru zutabe nagusietan arreta jarriz: euskal ekosistemako eragileen dinamizazioa; baliabideen erabilera simulatzeko eta optimizatzeko eta industria-sinergiak identifikatzeko modeloen garapena; eta, azkenik, teknologia berritzaileen erakustaldia, industria-ingurune errealetan proiektu pilotuen bidez.
Jarraian, industria-deskarbonizazioaren arloko ekimen eta lankidetza-aukera berriak aurkeztu ziren. Horien artean, lankidetza-proposamen berri bat, hainbat demo-proiektu barne hartzen dituena, Tecnaliak sinergia berriak identifikatzeko egindako analisietatik eratorriak, bai eta proiektu berriak bultzatzeko aukera ere Euskadiko Erregai Berriztagarrien 2030eko Ibilbide Orriaren esparruan. Ibilbide Orri hori EICek prestatu du, eta duela gutxi amaitu du etorkizuneko laguntza-deialdietarako lehentasunak ezartzeko prozesua.
Bilera elektrolizagailua eta hidrogeno laborategiak bisitatuz amaitu zen, non bazkideek Tecnaliak garatutako I+G jarduerak bertatik bertara ezagutu ahal izan zituzten.